Украинаның Днепропетровск облысы Кривой Рог қаласында орыс жазушылары Александр Пушкин мен Михаил Лермонтов ескерткіштері бұзылды. Бұл жөнінде "Первый Криворожский" және "На часi" жазды.
Олардың мәліметінше, отарсыздандыру туралы заң аясында ескерткіштер алынған. Бұған дейін қалада совет жазушысы Максим Горькийдің ескерткіші алынып тасталған.
2024 жылы жазда Кривой Рогта Совет одағы немесе Ресей империясына қатысы бар 135 топоним өзгертілген. Ал Днепропетровск облысында осындай 290 атау ауыстырылған. 2024 жылы қыркүйекте Одессада "Ресейдің империялық саясатының көрінісі бар" 19 ескерткіш алынған. Олардың тізіміне Александр II, жазушы Исаак Бабель, актер Владимир Высоцкий, барлаушы Зоя Космедемьянская, ғалым Иван Мичурин, ұшқыш Валерий Чкаловтың мүсіндері бар.
Оған дейін жазда 80-нен астам көше, даңғыл мен бульвардың аты ауыстырылған. Бунин, Жуковский, Паустовский, Гагарин көшелері жаңа атқа ие болған. Кейбіріне Ресейдің Украинаға қарсы ашқан соғысында ерлікпен қаза болғандардың аттары берілді.
2023 жылы наурызда Жоғарғы рада географиялық нысандарға Ресеймен байланысты атау беруге тыйым салатын заңды қабылдаған. 2024 жылдың қыркүйегінде декоммунизация және дерусификация саясаты аясында 327 елді мекеннің атын өзгерту туралы қаулы шыққан.
